The Dark Heaven திரைப்பட ரேட்டிங்: 3.5/5
Cast & Crew:
Siddhu, Darshika, Rithvika, Pradeep, Vela Ramamoorthy, Nizhalgal Ravi, Jayakumar, Arul D Shankar, Sathya, Chaplin Balu
Music: Sakthi Balaji
Cinematography: Manikandan P K
Editing: Raja Arumugam
Written & Directed by: Balaji
Produced by: Kothai Entertainment & MS Swiss Film Factory
‘தி டார்க் ஹெவன்’ மலை கிராமம் ஒன்றில் ஏழு வருடங்களுக்கு ஒருமுறை மர்மமான முறையில் ஆண்கள் இறந்து போகிறார்கள். இதற்கு வனமங்கையின் சாபம்தான் காரணம் என்று அந்த ஊர் மக்கள் நம்புகிறார்கள். இதற்கிடையில் எதிர்காலத்தில் நடக்கப்போகும் சம்பவங்களை முன்கூட்டியே சொல்லும் ஒரு மர்ம புத்தகமும் கதைக்குள் வருகிறது.
இந்த மர்மமான கிராமத்திற்கு போலீஸ் இன்ஸ்பெக்டராக வரும் சித்து அங்கு நடக்கும் தொடர் மரணங்கள் மற்றும் கொலைகள் குறித்து விசாரணையை தொடங்குகிறார். விசாரணை போக போக ஒவ்வொரு முடிச்சாக அவிழும் என்று பார்த்தால் அதற்கு பின்னால் இன்னொரு மர்மம் வந்து நிற்கிறது. ஒரு கட்டத்தில் சைக்கோ கொலையாளி பற்றிய தகவலும் வருவதால் கதை இன்னும் பரபரப்பாகிறது.
ஆனால் உண்மையில் இந்த கொலைகளுக்கும் அந்த சைக்கோ கொலையாளிக்கும் என்ன தொடர்பு, அந்த மர்ம புத்தகத்திற்கும் நடக்கும் சம்பவங்களுக்கும் என்ன சம்பந்தம், ஏழு வருடங்களுக்கு ஒருமுறை இந்த மரணங்கள் ஏன் நடக்கிறது என்பதுதான் படத்தின் முக்கியமான சஸ்பென்ஸ்.
படத்தின் மிகப்பெரிய பலம் திரைக்கதை. இயக்குநர் பாலாஜி மர்ம புத்தகம், பழைய சம்பவங்கள், சாபம், தொடர் கொலைகள் மற்றும் போலீஸ் விசாரணை என பல விஷயங்களை ஒன்றாக இணைத்து சுவாரஸ்யமாக கொண்டு சென்றிருக்கிறார்.
நாம் ஒரு கட்டத்தில் இவர்தான் கொலையாளியாக இருப்பாரோ என்று யூகிக்க ஆரம்பித்தால் அடுத்தடுத்து வரும் திருப்பங்கள் அந்த யூகங்களை மாற்றிக்கொண்டே இருக்கிறது. அதனால் படம் முழுவதும் அடுத்து என்ன நடக்கும் என்ற ஆர்வம் இருக்கிறது. குறிப்பாக கிளைமாக்ஸ் வரை சஸ்பென்ஸை தக்க வைத்திருப்பது நல்ல விஷயம்.
சித்து போலீஸ் அதிகாரியாக அமைதியான மற்றும் அழுத்தமான நடிப்பை கொடுத்திருக்கிறார். அதிகமாக பேசாமல் முகபாவனை மற்றும் உடல்மொழி மூலமாக கதாபாத்திரத்தை நன்றாக கொண்டு சென்றிருக்கிறார். முதல் படத்திலேயே அவருக்கு கொடுக்கப்பட்ட இந்த கதாபாத்திரத்தை சிறப்பாக கையாண்டிருக்கிறார்.
தர்ஷிகா, ரித்விகா, பிரதீப், வேல ராமமூர்த்தி, நிழல்கள் ரவி உள்ளிட்ட அனைவரும் அவரவர் கதாபாத்திரத்திற்கு ஏற்ற வகையில் நடித்திருக்கிறார்கள். குறிப்பாக ரித்விகாவின் கதாபாத்திரம் கவனம் ஈர்க்கிறது.
மணிகண்டன் பிகேவின் ஒளிப்பதிவு படத்திற்கு பெரிய பலம். மலை கிராமத்தின் சூழல், இரவு நேர காட்சிகள் மற்றும் மர்மமான இடங்களை கேமரா மூலம் நன்றாக காட்டியிருக்கிறார்.
சக்தி பாலாஜியின் பின்னணி இசையும் படத்தின் பதற்றத்தை அதிகரிக்கிறது. குறிப்பாக மர்மம் மற்றும் திகில் வரும் காட்சிகளில் இசை நன்றாக வேலை செய்திருக்கிறது. படத்தொகுப்பும் கதையின் வேகத்தை பெரும்பாலும் குறையாமல் பார்த்துக்கொள்கிறது.
அதே நேரத்தில் சில இடங்களில் இன்னும் கொஞ்சம் தெளிவாக கதையை சொல்லியிருக்கலாம். பழைய கால சம்பவங்களுக்கும் நிகழ்கால கொலைகளுக்கும் உள்ள தொடர்பை இன்னும் விரிவாக காட்டியிருந்தால் கிளைமாக்ஸ் இன்னும் வலுவாக இருந்திருக்கும். சில சண்டைக்காட்சிகளும் கதையின் ஓட்டத்தில் சற்று தேவையற்றதாக தெரிகிறது.
இருந்தாலும் இந்த குறைகளை தாண்டி மர்மம், சஸ்பென்ஸ், கிரைம் மற்றும் அமானுஷ்யம் என அனைத்தையும் கலந்து ஒரு விறுவிறுப்பான திரில்லர் அனுபவத்தை கொடுத்திருக்கிறார் இயக்குநர் பாலாஜி.
மொத்தத்தில், ‘தி டார்க் ஹெவன்’ ஒரு சுவாரஸ்யமான கிரைம் சஸ்பென்ஸ் திரில்லர் ரசிகர்களுக்கு பிடிக்கும்.