‘கெணத்த காணோம்’ திரைப்பட ரேட்டிங்: 2.5/5
Casting : Yogi Babu, Lovelyn, Raichal Rabecca, Ramakrishnan, Hello Kandhasamy,
Directed By : Suresh Sangaiah
Music By : Nivas K Prasanna
Produced By : S.R.Ramesh Babu & Jegan Baskaran
‘கெணத்த காணோம்’ ராமநாதபுரம் பகுதியில் இருக்கும் ஒரு கிராமத்தில் மக்கள் குடிநீருக்காக பல கிலோமீட்டர் தூரம் சென்று தண்ணீர் எடுத்து வர வேண்டிய நிலை. அந்த ஊரில் கோவில் பூசாரியாக இருக்கும் யோகி பாபு, மக்களுடன் சேர்ந்து வாழும் ஒரு சாதாரண மனிதராக காட்டப்படுகிறார்.
ஊருக்கு தண்ணீர் தேவை என்பதால் நீரோட்டம் பார்க்கும் போது, யோகி பாபுவின் வீட்டின் கீழ் தண்ணீர் இருப்பது தெரிய வருகிறது. ஆரம்பத்தில் தன் நிலத்தை கொடுக்க தயங்கினாலும், ஊருக்காக ஒத்துக் கொண்டு கிணறு தோண்ட அனுமதிக்கிறார். ஆனால் கிணறு தோண்டும் போது தண்ணீருக்கு பதிலாக டைனோசர் எலும்புகள் கிடைப்பது கதைக்கு பெரிய திருப்பமாகிறது. அதன் பிறகு அரசு மற்றும் தொல்லியல் துறை அந்த இடத்தை கைப்பற்ற, ஊர் மக்களுக்கும் அவர்களது நிலத்துக்கும் பிரச்சனை உருவாகிறது. இந்த சூழ்நிலையை யோகி பாபு எப்படி சமாளிக்கிறார், இறுதியில் தண்ணீர் பிரச்சனை தீருகிறதா என்பதே மீதிக் கதை.
யோகி பாபு இந்த படத்தில் வெறும் காமெடி நடிகராக இல்லாமல் ஒரு பொறுப்புள்ள மனிதராகவும், கிராமத்துக்காக சிந்திக்கும் நாயகனாகவும் நடித்திருக்கிறார். அவரது நகைச்சுவை இயல்பாக வந்தாலும், சில இடங்களில் இன்னும் அதிக ஈடுபாடு இருந்திருக்கலாம் என்ற உணர்வு வருகிறது. லவ்லின் சந்திரசேகர் கதாநாயகியாக வந்து தனது பங்கை சரியாக செய்திருக்கிறார், ஆனால் அவருடைய கதாபாத்திரத்திற்கு பெரிய முக்கியத்துவம் இல்லை.
ஹலோ கந்தசாமி வரும் காட்சிகள் எல்லாம் படத்திற்கு பெரிய பலம். அவர் பேசும் வசனங்கள் சிரிப்பை கூட்டுகிறது. ரேச்சல் ரெபெக்கா தொல்லியல் அதிகாரியாக நன்றாக நடித்திருக்கிறார். ஜார்ஜ் மரியான் உள்ளிட்ட மற்ற நடிகர்கள் எல்லோரும் உண்மையான கிராமத்து மக்களைப் போலவே இயல்பாக நடித்திருக்கிறார்கள்.
படத்தின் மிகப்பெரிய பலம் அதன் நேட்டிவிட்டி தான். கிராமத்து வாழ்க்கை, வறட்சி, மக்களின் கஷ்டம் எல்லாம் மிகவும் இயல்பாக காட்டப்பட்டுள்ளது. ஒளிப்பதிவு அந்த வறண்ட நிலத்தையும் சூழலையும் நம் கண்முன் கொண்டு வருகிறது. நிவாஸ் கே பிரசன்னாவின் பின்னணி இசை படத்தின் உணர்ச்சியை நன்றாக உயர்த்துகிறது.
ஆனால் படம் முழுவதும் நகைச்சுவை மையமாக செல்லும் போது, சில முக்கியமான காட்சிகளில் வரும் வலி சரியாக உணரப்படவில்லை என்ற குறையும் இருக்கிறது. இரண்டாம் பாதியில் சற்று மெதுவாக போகும் உணர்வும் வருகிறது.
மொத்தத்தில், ‘கெணத்த காணோம்’ சில குறைகள் இருந்தாலும், யோகி பாபுவின் வேற மாதிரியான நடிப்பும், கிராமத்து பின்னணியும் காரணமாக பார்க்க வேண்டிய படமாக இருக்கிறது.
