‘பரிமளா அண்ட் கோ’ திரைப்பட ரேட்டிங்: 3/5
Cast: Jayaram, Urvashi, Mysskin, Yogi Babu, Sandy, Santosh Sobhan, Sanjana Krishnamoorthy, Ananthika Sanilkumar and others.
Written & Directed by: Pandiraaj
Produced by: Lyca Productions, Tamilkumaran Productions Pvt. Ltd., Pasanga Productions
Cinematography: George C. Williams
Music: Foxn
Editing: Pradeep E. Ragav
Art Direction: T. Ramalingam.
‘பரிமளா அண்ட் கோ’ அப்பா பரிமளா, அம்மா சுதந்திரம், இரண்டு மகள்கள் என சந்தோஷமாக வாழும் ஒரு நடுத்தர குடும்பம். இளைய மகளுக்கு ஏரியாவில் செல்வாக்குடன் சுற்றும் வர்கீஸ் தொடர்ந்து காதல் தொல்லை கொடுத்து வருகிறார். நாளுக்கு நாள் அவரது அட்டகாசம் அதிகரிக்க, குடும்பத்தினர் அனைவரும் மன உளைச்சலுக்கு ஆளாகிறார்கள். ஒரு கட்டத்தில் அவரை கொலை செய்து விட்டால் தான் பிரச்சனை தீரும் என்று பேசிக்கொள்கிறார்கள். ஆனால் அவர்கள் நினைத்த மறுநாளே வர்கீஸ் கொலை செய்யப்படுகிறார். இதைத் தொடர்ந்து அந்த கொலையை செய்தது யார் என்ற மர்மத்தை சுற்றியே கதை நகர்கிறது.
நீண்ட இடைவெளிக்குப் பிறகு ஜெயராம் மற்றும் ஊர்வசி இணைந்து நடித்திருப்பது படத்தின் மிகப்பெரிய பலம். இருவரின் இயல்பான நடிப்பும் டைமிங் காமெடியும் பல இடங்களில் சிரிக்க வைக்கிறது. குறிப்பாக குடும்பத்திற்குள் நடக்கும் சாதாரண உரையாடல்களே நகைச்சுவையாக மாறியிருப்பது ரசிக்க வைக்கிறது.
மகள்களாக நடித்துள்ள சஞ்சனா கிருஷ்ணமூர்த்தி மற்றும் அனந்திகா சனில்குமார் தங்களது கதாபாத்திரங்களை நம்பகமாக செய்திருக்கிறார்கள். சாண்டி இந்த படத்தில் வழக்கமான நடன இயக்குநர் பிம்பத்தை தாண்டி வித்தியாசமான கதாபாத்திரத்தில் கவனம் ஈர்க்கிறார். காவல்துறை அதிகாரியாக வரும் மிஷ்கின் தனது தனித்துவமான நடிப்பாலும் உடல் மொழியாலும் படத்திற்கு கூடுதல் சுவாரஸ்யத்தை சேர்த்திருக்கிறார். யோகி பாபு, பூர்ணிமா ரவி, பகவதி பெருமாள், சிங்கம் புலி உள்ளிட்டவர்களும் தங்களுக்கு கொடுக்கப்பட்ட வேலையை சரியாக செய்திருக்கிறார்கள்.
ஜார்ஜ் சி வில்லியம்ஸின் ஒளிப்பதிவு காட்சிகளுக்கு அழகை சேர்க்கிறது. ஃபாக்ஸனின் பாடல்களும் பின்னணி இசையும் பல இடங்களில் படத்திற்கு துணை நிற்கின்றன. பிரதீப் இ ராகவின் படத்தொகுப்பு வேகமாக நகர முயற்சித்தாலும் சில இடங்களில் அந்த வேகமே குழப்பத்தையும் உருவாக்குகிறது.
இயக்குநர் பாண்டிராஜ் ஒரு கொலை மர்ம கதையை குடும்ப நகைச்சுவையுடன் கலந்து சொல்ல முயற்சித்திருக்கிறார். முதல் பாதியில் குடும்ப உறுப்பினர்களின் கலகலப்பான உரையாடல்களும் சில காமெடி காட்சிகளும் நன்றாக வேலை செய்கின்றன. ஆனால் வர்கீஸ் கொலைக்குப் பிறகு கதை த்ரில்லர் பாதையில் செல்லும்போது எதிர்பார்த்த பரபரப்பும் பதற்றமும் முழுமையாக கிடைக்கவில்லை. அதிகமான கதாபாத்திரங்கள், பல கிளைக்கதைகள் மற்றும் அடிக்கடி வரும் திருப்பங்கள் கதையின் மையத்தை பல இடங்களில் பலவீனப்படுத்துகின்றன.
அதே நேரத்தில் பெண்களுக்கு எதிரான தொல்லைகள், போதை பழக்கத்தால் இளைஞர்கள் சீரழிவது போன்ற சமூக பிரச்சனைகளை படத்தின் மூலம் பேச முயன்றிருப்பது பாராட்டத்தக்கது. குறிப்பாக கிளைமாக்ஸில் சொல்லப்படும் கருத்து படத்திற்கு ஒரு முக்கியத்துவத்தை கொடுக்கிறது.
மொத்தத்தில், ‘பரிமளா அண்ட் கோ’ சில நகைச்சுவை தருணங்கள் மற்றும் சமூக கருத்துக்காக ஒருமுறை குடும்பத்துடன் பார்க்கக்கூடிய காமெடி த்ரில்லராக அமைந்திருக்கிறது.
