‘டாக்ஸிக்’ திரைப்பட ரேட்டிங்: 2/5
CAST:
Yash – Raya
Nayanthara – Ganga
Kiara Advani – Nadia
Tara Sutaria – Rebecca
Huma Qureshi – Elizabeth
Rukmini Vasanth – Mellisa
CREW:
Written & Directed by – Geetu Mohandas
Produced by – KVN Productions & Monster Mind Creations
DOP – Rajeev Ravi
Music – Ravi Basrur, Vishal Mishra & Tanishk Bagchi
Editor – Ujwal Kulkarni
Production Designer – T. P. Abid
Action Directors – J. J. Perry, Anbariv, Kecha Khamphakdee & Amrit Singh
Tamil Dialogues – Ganesh Subramanian
VFX – DNEG
Publicity Design – Kabilan Chelliah
Visual Promotion – Ruben Trailer House
PRO – Yuvraaj
‘டாக்ஸிக்’ படம் 1947 முதல் 1970 வரையிலான காலகட்டத்தில் போர்த்துகீசியர்களின் கட்டுப்பாட்டில் இருந்த கோவாவை பின்னணியாக கொண்டு உருவாக்கப்பட்டுள்ள கேங்ஸ்டர் ஆக்சன் திரைப்படமாக இருக்கிறது. ராயா மற்றும் அவரது சகோதரி கங்கா ஆகிய இருவரின் வாழ்க்கையை மையமாக வைத்து கதை தொடங்குகிறது. சிறுவயதில் அனாதைகளாகும் இருவரும் கோவாவின் இருண்ட உலகிற்குள் நுழைகிறார்கள். தனது தம்பி ராயா பெரிய ஆளாக வேண்டும் என்ற ஆசையில் கங்கா அவருக்கு துணையாக இருக்கிறார். காலப்போக்கில் ராயா கோவாவின் மிகப்பெரிய கேங்ஸ்டராக உருவெடுக்கிறார்.
ராயாவின் வாழ்க்கையில் ரெபேக்கா நதியா உள்ளிட்ட பெண்கள் வருவதால் அவரது தனிப்பட்ட வாழ்க்கையிலும் பல்வேறு பிரச்சனைகள் ஏற்படுகின்றன. அதே நேரத்தில் கேங்ஸ்டர் உலகில் எதிரிகளும் அதிகரிக்கிறார்கள். கங்காவின் மரணம் ராயாவின் வாழ்க்கையையே புரட்டிப் போடுகிறது. அதன் பிறகு ராயாவின் வாழ்க்கை வேறு ஒரு பாதையில் செல்ல, அவரது கடந்த காலமும் அவரது மகன் டிக்கெட்டும் கதைக்குள் வருகிறார்கள். இறுதியில் ராயாவின் வாழ்க்கையில் நடந்த சம்பவங்களுக்கும் அவரது குடும்பத்திற்கும் பின்னால் இருக்கும் உண்மைகள் என்ன என்பதை படம் சொல்கிறது.
யாஷ் ராயா மற்றும் டிக்கெட் என இரண்டு வேடங்களில் நடித்திருக்கிறார். அவரது ஸ்கிரீன் பிரசென்ஸ் மற்றும் ஆக்சன் காட்சிகளில் வரும் மாஸ் தோற்றம் ரசிகர்களை கவரக்கூடியதாக இருக்கிறது. குறிப்பாக நடை உடை மற்றும் ஆக்சன் காட்சிகளில் யாஷின் மாஸ் இமேஜ் நன்றாக பயன்படுத்தப்பட்டுள்ளது. ஆனால் கேஜிஎஃப் படங்களில் பார்த்த ராக்கி பாய் சாயல் பல இடங்களில் தெரிகிறது. அதிகமான ஆக்சன் மற்றும் மாஸ் காட்சிகள் காரணமாக யாஷின் நடிப்பில் இருக்கும் உணர்வுப்பூர்வமான பகுதிகள் முழுமையாக வெளிப்படவில்லை.
நயன்தாரா கங்கா கதாபாத்திரத்தில் ஆரம்பத்தில் கம்பீரமாகவும் வலிமையான சகோதரியாகவும் கவனம் பெறுகிறார். அக்கா தம்பி உறவு தொடர்பான காட்சிகளில் அவரது நடிப்பு நன்றாக இருக்கிறது. ஆனால் கதையின் ஒரு கட்டத்துக்கு பிறகு அவரது கதாபாத்திரத்திற்கு முக்கியத்துவம் குறைந்து விடுகிறது. கியாரா அத்வானி நதியா கதாபாத்திரத்தில் அழகாகவும் இயல்பாகவும் நடித்திருக்கிறார். தாரா சுதாரியா ஹுமா குரேஷி மற்றும் ருக்மணி வசந்த் ஆகியோரும் தங்களுக்கு கொடுக்கப்பட்ட கதாபாத்திரங்களை செய்திருக்கிறார்கள். இருந்தாலும் இவ்வளவு முன்னணி நடிகர்கள் இருந்தும் அவர்களது கதாபாத்திரங்களுக்கு போதுமான ஆழம் கொடுக்கப்படவில்லை.
ஒளிப்பதிவாளர் ராஜீவ் ரவியின் பணிதான் படத்தின் மிகப்பெரிய பலங்களில் ஒன்று. பழைய காலத்து கோவாவின் தோற்றத்தையும் கேங்ஸ்டர் உலகத்தின் இருண்ட தன்மையையும் பிரம்மாண்டமான காட்சிகளாக திரையில் கொண்டு வந்திருக்கிறார். செட்கள் உடைகள் வண்ணங்கள் மற்றும் கிராபிக்ஸ் ஆகியவை படத்திற்கு ஒரு பெரிய உலகத்தை உருவாக்குகின்றன. ஆக்சன் காட்சிகளும் பிரம்மாண்டமாகவும் வித்தியாசமான முறையிலும் படமாக்கப்பட்டுள்ளன.
ரவி பஸ்ரூர் விஷால் மிஸ்ரா மற்றும் தனிஷ்க் பாக்சி ஆகியோரின் இசையில் சில பாடல்கள் பெரிதாக கவரவில்லை என்றாலும் பின்னணி இசை ஆக்சன் காட்சிகளுக்கு தேவையான வேகத்தை கொடுக்கிறது. சில இடங்களில் பின்னணி இசை அதிக சத்தமாக இருப்பது காட்சிகளின் உணர்வை குறைக்கிறது. சண்டைக்காட்சிகள் படத்தின் முக்கியமான பலமாக இருந்தாலும் படம் முழுவதும் தொடர்ந்து வரும் வன்முறை காட்சிகள் ஒரு கட்டத்தில் சலிப்பை ஏற்படுத்துகின்றன.
படத்தின் மிகப்பெரிய பிரச்சனை திரைக்கதைதான். பல கிளைக்கதைகள் மற்றும் அதிகமான கதாபாத்திரங்கள் இருப்பதால் கதை எந்த திசையில் செல்கிறது என்பதை புரிந்து கொள்வதற்கு நேரம் ஆகிறது. முதல் பாதியில் கேங்ஸ்டர் உலகம் அக்கா தம்பி பாசம் காதல் என கதை பல திசைகளில் பயணிக்கிறது. இரண்டாம் பாதியில் தந்தை மகன் தொடர்பான கதை வரும் போது குழப்பம் மேலும் அதிகரிக்கிறது. மூன்று மணி நேரத்திற்கும் அதிகமான படத்தின் நீளமும் சில இடங்களில் சோர்வை ஏற்படுத்துகிறது. இன்னும் கொஞ்சம் காட்சிகளை குறைத்து எடிட்டிங் செய்திருந்தால் படம் வேகமாகவும் தெளிவாகவும் இருந்திருக்கும்.
இயக்குநர் கீது மோகன்தாஸ் ஒரு பெரிய உலகத்தை உருவாக்கி அதை வித்தியாசமான முறையில் காட்சிப்படுத்த முயற்சி செய்திருக்கிறார். ஆனால் அந்த பிரம்மாண்டத்திற்கும் ஆக்சன் காட்சிகளுக்கும் இணையாக வலுவான திரைக்கதை இல்லாதது படத்திற்கு பின்னடைவாக அமைந்துள்ளது. சில இடங்களில் கதாபாத்திரங்களின் உணர்வுகளை அழுத்தமாக சொல்லாமல் அடுத்தடுத்த சம்பவங்களுக்கு சென்று விடுவதால் முக்கியமான காட்சிகளின் தாக்கம் குறைந்து விடுகிறது.
மொத்தத்தில், ‘டாக்ஸிக்’ யாஷின் ரசிகர்களும் பிரம்மாண்டமான ஆக்சன் படங்களை விரும்புபவர்களும் படத்தை ரசிக்கலாம். ஆனால் வலுவான கதை மற்றும் உணர்வுப்பூர்வமான கேங்ஸ்டர் திரைப்படத்தை எதிர்பார்த்து செல்பவர்களுக்கு டாக்ஸிக் முழுமையான திருப்தியை கொடுக்காமல் போகலாம்.