‘சிங்காரம்’ திரைப்பட விமர்சனம்

‘சிங்காரம்’ திரைப்பட ரேட்டிங்: 3.5/5

Cast & Crew:

Yogi Babu, M.S. Bhaskar, Vela Ramamoorthy, Maria Vincent, Charms, Aarthi Ganesh, Manobala, Kalki, Marimuthu, Padava Gopi, Sendrayan, Deepa Shankar and others.

Crew:

– Writer & Director: K.V. Kathirvelu
– Producer: A.S. Ramana Balaji, Padmavathi Gandhi
– Production Banner: Rock Productions
– Music: Sam C.S.
– Cinematography: Prasanna S. Kumar
– Editor: Lawrence Kishore
– Art Director: Gururaj
– Stunt: Phantom Pradeep
– PRO: Riyas K. Ahmad, Paras Riyas

‘சிங்காரம்’ நரிக்குறவர் சமூக மக்களின் வாழ்க்கையையும், அவர்கள் பல ஆண்டுகளாக சந்தித்து வரும் புறக்கணிப்புகள் மற்றும் உரிமைப் போராட்டங்களையும் மையமாக வைத்து உருவாகியிருக்கும் திரைப்படம் சிங்காரம்.

நரிக்குறவர் சமூகத்தைச் சேர்ந்த யோகி பாபு தனது குடும்பத்தினருடன் நாடோடி வாழ்க்கை வாழ்ந்து வருகிறார். நிரந்தர இருப்பிடமும் அடையாள ஆவணங்களும் இல்லாததால், ரேஷன் பொருட்கள் உள்ளிட்ட அடிப்படை அரசு உதவிகளைக்கூட பெற முடியாமல் அவரது சமூகத்தினர் பல்வேறு அவமானங்களைச் சந்திக்கிறார்கள். இந்த நிலையில், லாட்டரி பரிசு மூலம் யோகி பாபுவின் வாழ்க்கையில் பெரிய மாற்றம் ஏற்படுகிறது. ஆனால் தனக்கு மட்டும் கிடைத்த பணமும் மரியாதையும் தனது சமூக மக்களுக்கும் கிடைக்க வேண்டும் என்று நினைக்கும் அவர், அவர்களின் உரிமைகளுக்காகப் போராடத் தொடங்குகிறார். அந்தப் போராட்டம் அரசியல் களத்திற்கு எப்படி செல்கிறது என்பதுதான் படத்தின் மீதிக்கதை.

வழக்கமாக நகைச்சுவை கதாபாத்திரங்களில் பார்க்கப்படும் யோகி பாபு, இந்தப் படத்தில் முற்றிலும் மாறுபட்ட நடிப்பை வெளிப்படுத்தியிருக்கிறார். தனது வழக்கமான நகைச்சுவை பாணியை அளவாகப் பயன்படுத்தி, உணர்ச்சிகரமான காட்சிகளிலும் இயல்பாக நடித்திருப்பது பாராட்டுக்குரியது. குறிப்பாக, தனது சமூக மக்களின் அவலநிலையைப் பார்த்து வருந்தும் காட்சிகளில் கவனம் ஈர்க்கிறார்.

யோகி பாபுவின் தந்தையாக வரும் எம்.எஸ். பாஸ்கர் தனது அனுபவமிக்க நடிப்பால் படத்திற்கு வலு சேர்க்கிறார். வேல ராமமூர்த்தி கம்பீரமான நடிப்பை வழங்கியிருக்கிறார். வில்லத்தனமான கதாபாத்திரத்தில் சென்ட்ராயன் வித்தியாசமாக நடித்திருக்கிறார். மாரிமுத்து, படவா கோபி, தீபா சங்கர், மனோபாலா உள்ளிட்ட மற்ற நடிகர்களும் தங்களது கதாபாத்திரங்களுக்கு ஏற்ற நடிப்பை வழங்கியிருக்கிறார்கள்.

பிரசன்னா எஸ். குமாரின் ஒளிப்பதிவு கதையின் இயல்புத்தன்மையை அழகாகப் பதிவு செய்திருக்கிறது. சாம் சி.எஸ். இசையும் பின்னணி இசையும் உணர்ச்சிகரமான காட்சிகளுக்கு பலம் சேர்க்கின்றன. லாரன்ஸ் கிஷோரின் படத்தொகுப்பு படத்தை ஓரளவு விறுவிறுப்பாக நகர்த்துகிறது. குருராஜின் கலை இயக்கமும் நரிக்குறவர் மக்களின் வாழ்க்கை முறையை இயல்பாகக் காட்டியிருக்கிறது.

உண்மைச் சம்பவங்களை அடிப்படையாகக் கொண்டு கதையை எழுதி இயக்கியிருக்கும் கே.வி. கதிர்வேலு, ஒரு சமூகத்தின் அடையாளம், சம உரிமை மற்றும் அரசியல் அதிகாரத்தின் முக்கியத்துவத்தை அழுத்தமாகப் பதிவு செய்திருக்கிறார். பணம் இருந்தால் மட்டுமே ஒருவருக்கு மரியாதை கிடைக்கிறதா, ஒரு சமூகத்தின் முன்னேற்றத்திற்கு கல்வி, வேலைவாய்ப்பு மற்றும் அரசியல் பிரதிநிதித்துவம் எவ்வளவு முக்கியம் போன்ற கேள்விகளை படம் எழுப்புகிறது.

முதல் பாதியில் நரிக்குறவர் மக்களின் வாழ்க்கை முறையையும் அவர்கள் சந்திக்கும் பிரச்சினைகளையும் பதிவு செய்திருக்கும் இயக்குநர், இரண்டாம் பாதியில் அவர்களின் உரிமைக்கான அரசியல் போராட்டத்தை மையப்படுத்தியிருக்கிறார். சில இடங்களில் காட்சிகள் நீளமாக இருப்பதும், அரசியல் திருப்பங்கள் இன்னும் யதார்த்தமாக அமைந்திருக்கலாம் என்பதும் படத்தின் குறைகளாக இருக்கின்றன.

மொத்தத்தில்,’சிங்காரம்’ வழக்கமான நகைச்சுவை படமாக இல்லாமல் ஒரு சமூகத்தின் வலியையும் உரிமைக்கான குரலையும் யோகி பாபுவின் மூலம் சொல்லியிருக்கும் சிங்காரம், சில குறைகள் இருந்தாலும் சமூக அக்கறையுடன் பார்க்க வேண்டிய திரைப்படம்.