’99/66′ திரைப்பட ரேட்டிங்: 2.5/5
Casting : Rachitha Mahalakshmi, Swetha, Sabari, Rohind, Bhavan Krishna, Singam Puli, Mullai, Kothandam, KR Vijaya, PL Thenappan, MS Murthy
Directed By : MS Murthy
Music By : MS Murthy
Produced By : Mithra Pictures Pvt.Ltd – MS Murthy
’99/66′ ஒரு திகில் மற்றும் அமானுஷ்யம் கலந்த படம். ரக்சிதா மகாலட்சுமி மற்றும் சபரி காதலித்து திருமணம் செய்து கொண்ட தம்பதிகள். அவர்கள் ஒரு அடுக்குமாடி குடியிருப்பில் 66 ஆம் எண் வீட்டை வாங்கி குடியேறுகிறார்கள். அதே குடியிருப்பின் 99 ஆம் எண் வீட்டில் வசிக்கும் ஸ்வேதாவுடன் ரக்சிதாவுக்கு நட்பு உருவாகிறது. இருவரும் அடிக்கடி சந்தித்து பேச ஆரம்பிக்கிறார்கள்.
ஆனால் அந்த குடியிருப்பில் சில விசித்திரமான சம்பவங்கள் நடக்க ஆரம்பிக்கிறது. இதற்கிடையில் ரக்சிதாவின் கணவர் சபரி பணத்திற்காக அவரைக் கொலை செய்ய பலமுறை முயற்சி செய்கிறார். ஆனால் ஒவ்வொரு முறையும் ரக்சிதா ஏதோ ஒரு காரணத்தால் உயிர் தப்பி விடுகிறார். அதே நேரத்தில் குடியிருப்பின் சங்கத் தலைவர் எம் எஸ் மூர்த்தி இரவு நேரங்களில் யாருக்கும் தெரியாமல் வெளியே செல்ல முயற்சி செய்வதும், ஒரு ஆந்தை அவரை தடுத்து நிறுத்துவது போன்ற மர்ம சம்பவங்களும் நடக்கிறது. ஒரு நாள் ஸ்வேதாவை அவரது கணவர் கொலை செய்யப் போகிறார் என்று ரக்சிதாவுக்கு தோன்றுகிறது. அவரைக் காப்பாற்ற மற்ற குடியிருப்பவர்களை அழைக்கும் போது தான் ஒரு அதிர்ச்சியான உண்மை தெரிகிறது. ஸ்வேதா ஏற்கனவே இறந்து விட்டவர் என்றும் 99 ஆம் எண் வீட்டில் யாரும் வசிக்கவில்லை என்றும் தெரிய வருகிறது.
அப்படியானால் ரக்சிதாவுடன் இத்தனை நாளாக நட்பாக பழகியது யார், அந்த குடியிருப்பில் இருக்கும் அமானுஷ்ய சக்தி என்ன, இந்த சம்பவங்களின் பின்னால் இருக்கும் உண்மை என்ன என்பதையே படம் திகிலும் திருப்பங்களும் கலந்து சொல்லுகிறது. படத்தின் முக்கிய பலமாக ரக்சிதா மகாலட்சுமியின் நடிப்பு இருக்கிறது. மனைவியாக அமைதியாக இருக்கும் காட்சிகளிலும், பின்னர் ஆவி புகுந்து ஆக்ரோஷமாக மாறும் காட்சிகளிலும் அவர் கவனம் ஈர்க்கிறார். ஸ்வேதா புத்த மதத்தை பின்பற்றும் பெண்ணாக அனைத்து உயிர்களிடமும் அன்பு செலுத்த வேண்டும் என்ற எண்ணத்துடன் வரும் வேடத்தில் நடித்திருக்கிறார். சபரி மற்றும் ரோகிந்த் புதுமுகங்களாக இருந்தாலும் நல்லவர்களாக தோன்றும் வில்லன் குணங்களை நன்றாக வெளிப்படுத்தியிருக்கிறார்கள். சாம்ஸ், முல்லை, கோதண்டம், சிங்கம்புலி ஆகியோரின் காமெடி சில இடங்களில் வேலை செய்கிறது.
கே ஆர் விஜயா, பவன் கிருஷ்ணா, பி எல் தேனப்பன் மற்றும் இயக்குநர் எம் எஸ் மூர்த்தி ஆகியோரும் கதைக்கேற்ற வேடங்களில் நடித்திருக்கிறார்கள். ஒளிப்பதிவாளர் சேவிலோ ராஜா ஒரே அடுக்குமாடி குடியிருப்பை பல்வேறு கோணங்களில் காட்டி காட்சிகளை சுவாரஸ்யமாக உருவாக்கியிருக்கிறார். மீனாட்சி சுந்தரத்தின் படத்தொகுப்பு கதையை சீராக நகர்த்த உதவுகிறது. கதை, திரைக்கதை, வசனம், பாடல்கள், இசை, இயக்கம் மற்றும் தயாரிப்பு என பல பொறுப்புகளை எம் எஸ் மூர்த்தி கவனித்திருக்கிறார்.
திகில் கதையாக இருந்தாலும் பெண்களுக்கு எதிரான குற்றங்கள், குற்றவாளிகளுக்கு தகுந்த தண்டனை, அனைத்து உயிர்களிடத்தும் அன்பு செலுத்த வேண்டும் போன்ற கருத்துகளையும் படத்தில் சொல்ல முயற்சி செய்திருக்கிறார். முதல் பாதி கொஞ்சம் குழப்பமாக இருந்தாலும் இரண்டாம் பாதியில் கதையின் மர்மங்கள் வெளிவரும்போது படம் சுவாரஸ்யமாக மாறுகிறது.
மொத்தத்தில்,’99/66′ அடுக்குமாடி குடியிருப்பை மையமாக வைத்து உருவாக்கப்பட்ட திகில் படம் என்ற வகையில் ஓரளவு வித்தியாசமான அனுபவத்தை தருகிறது.
