‘பேட் கேர்ள்’ திரைப்பட ரேட்டிங்: 2.5/5
Casting : Anjali Sivaraman, Shanthipriya, Saranya Ravichandran, Hridhu Haroon, Teejay Arunasalam, Sashank Bommireddipalli
Directed By : Varsha Bharath
Music By : Amit Trivedi
Produced By : Grass Root Film Company
ரம்யாவின் வாழ்க்கைச் சுருக்கத்தை மையமாகக் கொண்ட இந்த படம், பள்ளிப் பருவத்தில் தொடங்கிய காதலிலிருந்து அவள் சந்திக்கும் ஏமாற்றங்கள் வரை நம்மை அழைத்துச் செல்கிறது. ஆரம்பத்தில் பள்ளி நண்பனுடன் தொடங்கிய பாசம், பெற்றோரின் கட்டுப்பாட்டால் முறியடிக்கப்படுகிறது. புதிய பள்ளியில் சேரும் ரம்யா, “இங்குவரை உன் பேச்சைக் கேட்பேன், அடுத்தது என் விருப்பப்படி செய்வேன்” என்று தன் அம்மாவிடம் சொல்லும் சவாலான உரையாடலே கதையின் அடிப்படை. அந்த நிமிடத்தில், அவள் தேடும் சுதந்திரத்தின் திசை பார்வையாளர்களுக்கு தெரிகிறது.
புதிய சூழலில், சீனியர் மாணவருடன் ஏற்பட்ட உறவு, காதலா அல்லது வெறும் மோசடியா என்பது கதை நகர்ந்தபோது தெளிவாகிறது. காதலில் அலைந்து கொண்டிருக்கும் ரம்யா, அதனால் மருத்துவமனைக்குச் செல்லும் அளவுக்கு பாதிக்கப்படுகிறார். அந்த நிலையிலிருந்து எழும் மோதல்களும், ஏமாற்றங்களும், அவளது பயணத்தில் மிகப்பெரிய திருப்பங்களாக மாறுகின்றன.
இயக்குனர் வர்ஷா, பெண்களின் சுதந்திரத்தை மிகவும் இயல்பாகச் சொல்ல முயற்சித்துள்ளார். பாட்டி–அம்மா–மகள் மூன்று தலைமுறைகளின் வாழ்வியல் வேறுபாடுகள், பெண்களுக்கு சுதந்திரம் எவ்வளவு மெல்ல கிடைத்துள்ளது என்பதையும், அது அடுத்த தலைமுறைக்கு எப்படிச் செல்ல வேண்டும் என்பதையும் நுட்பமாக வெளிப்படுத்தியுள்ளார். “பாட்டி வீட்டுக்குள், அம்மா வேலைக்கு, நான் முடிவெடுக்கிறேன், என் மகளுக்கு இன்னும் பெரிய சுதந்திரம் வேண்டும்” என்ற ரம்யாவின் குரல், படத்தின் பிரதான செய்தியாக இருக்கிறது.
இந்தப் பயணத்தில் காதல், பிரிவு, வேதனை எல்லாமே வரும், ஆனால் வாழ்க்கை அதில் சிக்கிக்கொள்ளாது என்பதே இயக்குனர் சொல்ல விரும்பும் கருத்து. ரம்யா பல்வேறு காதல்களை அனுபவித்தாலும், கடைசியில் தான் எது உண்மையானது, எது இல்லை என்று கொஞ்சம் தெளிவடைகிறார். காலம் நமக்காக நிற்காது, நாம் முன்னே நகர வேண்டும் என்ற அடிப்படை உணர்வு கதாபாத்திரத்தின் வழியாக பார்வையாளர்களை சென்றடைகிறது.
படம் முழுக்க வணிகத் தன்மையில் சலிக்க வைக்கும் அம்சங்களைத் தவிர்த்திருப்பதால், சாதாரண பொழுதுபோக்கை விரும்பும் ரசிகர்களுக்கு இது சற்றே கடினமாக இருக்கலாம். ஆனால் உலக சினிமா, கலைப்படங்கள் ஆகியவற்றை ரசிப்பவர்களுக்கு, இது ஒரு சிந்தனை ஊட்டும் முயற்சியாகத் தெரியும். ஒளிப்பதிவு லைவாகவும் இயல்பாகவும் இருந்தது, அமித் திரிவேதி இசையால் படத்தின் உணர்ச்சிகள் இன்னும் வலுவடைந்தன.
