‘LSS: Love Subscribe Share’ திரைப்பட ரேட்டிங்: 2.5/5
Casting : Aadhav Krishna, Simran, Badava Gopi, Vinodhini, Jawa Sundaresan, Rohit, Dhananjeyan, Muthu Buvan
Directed By : R.Mahalakshmi Murugan
Music By : Ashwamithra
Produced By : JB Films, Jones Presents – P. Raghu
‘LSS: Love Subscribe Share’ இன்றைய இளைஞர்களின் காதல், சமூக ஊடக தாக்கம், குடும்ப உணர்வுகள் மற்றும் திடீர் த்ரில்லர் திருப்பங்களை இணைத்து சொல்ல முயற்சிக்கும் ஒரு காதல் திரைப்படம்.
கதை சென்னையில் படிக்கும் சிவா மற்றும் பூஜாவை மையமாகக் கொண்டு தொடங்குகிறது. நடுத்தர வர்க்கத்தைச் சேர்ந்த, படிப்பில் கவனம் செலுத்தும் இளைஞன் சிவா. பணக்கார பின்னணியில் வளரும், தாயை இழந்த ஏக்கத்துடன் வாழும் பூஜா. கல்லூரி சந்திப்பில் தொடங்கும் நட்பு, மெதுவாக காதலாக மாறுகிறது. இருவருக்கும் சமூக ஊடக உலகில் பிரபலமாக வேண்டும் என்ற ஆர்வமும் உள்ளது. ஆரம்பத்தில் லைக், சப்ஸ்கிரைப், ஆன்லைன் இமேஜ் போன்ற விஷயங்கள் முக்கியமாக தோன்றினாலும், உண்மையான உறவு அதைவிட பெரியது என்பதை கதை மெதுவாக எடுத்துக்காட்டுகிறது.
சிவாவின் குடும்பம் இந்தக் காதலை ஏற்றுக்கொள்கிறது. ஆனால் பூஜாவின் தொழிலதிபர் தந்தை ஸ்டேட்டஸ் காரணமாக எதிர்க்கிறார். தன்னைவிட்டு பிரிந்து காசியில் வாழும் தாயை சந்தித்து ஆசீர்வாதம் பெற வேண்டும் என்ற ஆசையில் பூஜா, சிவாவுடன் காசி செல்கிறாள். அங்கு தாயை தனியாகச் சந்திக்கச் சென்ற பூஜா ஒரு விபத்தில் சிக்கி மூளைச்சாவு நிலைக்கு தள்ளப்படுகிறார். இதை அறியாத சிவா அவளைத் தேடி அலைகிறார். இதற்கிடையில் பூஜாவின் தந்தை சிவாவை கடத்தல்காரன் என சந்தேகித்து போலீசில் புகார் அளிக்கிறார். மருத்துவமனையில் நடக்கும் சட்டவிரோத செயல்கள், உறுப்புகள் திருடும் முயற்சி போன்ற அம்சங்கள் கதைக்கு த்ரில்லர் கோணத்தை கொடுக்கின்றன. இறுதியில் காதல் வெற்றி பெறுகிறதா, பூஜா மீள்கிறாளா என்பதே மீதிக்கதை.
அறிமுக நாயகனாக ஆதவ் கிருஷ்ணா நம்பிக்கையுடன் நடித்துள்ளார். காதல், உணர்ச்சி, பதட்டம் என பல தருணங்களில் இயல்பாக தெரிகிறார். சில இடங்களில் இன்னும் அனுபவம் தேவைப்படுகிறதே என்ற உணர்வு இருந்தாலும், முதல் படத்துக்கு நல்ல முயற்சி. சிம்ரன் அத்வானி துடுக்கான கல்லூரி மாணவியாகவும், பின்னர் உணர்ச்சி காட்சிகளில் மனதை தொடும் விதமாகவும் நடித்துள்ளார். எதிர்காலத்தில் நல்ல வாய்ப்புகள் கிடைக்கக்கூடிய முகம்.
சிவாவின் பெற்றோராக நடித்த படவா கோபி மற்றும் வினோதினி இயல்பான நடிப்பால் குடும்ப உணர்வுகளை வெளிப்படுத்துகின்றனர். ஜாவா சுந்தரேசன் நகைச்சுவை ட்ராக்கில் சிரிப்பை கொடுக்க முயற்சிக்கிறார். துணை கதாபாத்திரங்கள் கதையின் ஓட்டத்திற்கு தேவையான ஆதரவை தருகின்றன.
ஒளிப்பதிவாளர் என் எஸ் சதீஷ் குமார் சென்னையும் காசியும் வெவ்வேறு மனநிலையுடன் அழகாக பதிவு செய்துள்ளார். குறிப்பாக காசி காட்சிகள் பார்வைக்கு நன்றாக உள்ளன. அஸ்வமித்ராவின் இசை படத்தின் பலமாகும். காதல் பாடல்கள் மனதில் நிற்கின்றன. பின்னணி இசையும் உணர்ச்சி மற்றும் பதட்ட காட்சிகளில் உதவுகிறது. தொகுப்பு வேகமாக உள்ளது.
இயக்குனர் ஆர் மகாலட்சுமி முருகன் முதல் பாதியில் கலகலப்பான கல்லூரி காதலை, இரண்டாம் பாதியில் உணர்ச்சி மற்றும் த்ரில்லர் திருப்பங்களுடன் நகர்த்த முயற்சி செய்துள்ளார். சமூக ஊடக உலகின் வெளிப்படையான பிரபலமையும், உண்மையான உறவின் ஆழத்தையும் ஒப்பிடும் முயற்சி பாராட்டத்தக்கது. ஆனால் சில இடங்களில் திரைக்கதை நம்பகத்தன்மை குறைகிறது. குறிப்பாக நாயகியின் தாயின் பின்னணி, காசி பயணத்தின் அவசியம், கிளைமாக்ஸ் கையாளுதல் போன்றவை இன்னும் வலுவாக இருந்திருக்கலாம் என்ற எண்ணம் வருகிறது.
மொத்தத்தில் ‘LSS: Love Subscribe Share’ ஒரு இளம் தலைமுறையை குறிவைத்து எடுக்கப்பட்ட காதல் படம். முதல் பாதி லைட்டான கல்லூரி ரொமான்ஸ், இரண்டாம் பாதி எமோஷன் மற்றும் த்ரில்லர் கலவையாக உள்ளது. குறைகள் இருந்தாலும் புதியவர்களின் நேர்மையான முயற்சியாக ஒருமுறை பார்க்கக்கூடிய படம் என்று சொல்லலாம்.
