‘தி பாரடைஸ்’ திரைப்பட ரேட்டிங்: 2/5
Cast: Nani, Kayadu Lohar, Mohan Babu, Sonali Kulkarni, Raghav Juyal, Eeshwari Rao
Crew: இயக்கம் – Srikanth Odela | இசை – Anirudh Ravichander | ஒளிப்பதிவு – CH Sai | படத்தொகுப்பு – Naveen Nooli | தயாரிப்பு – Sudhakar Cherukuri
‘தி பாரடைஸ்’ 1980களில் செகந்திராபாத்தில் வாழும் சவாரி இன மக்களின் அடிமை வாழ்க்கையையும் அவர்களுக்கான அடையாளத்தையும் உரிமையையும் பெற அவர்கள் நடத்தும் போராட்டத்தையும் மையமாக வைத்து உருவாகியிருக்கிறது
சடையன் கதாபாத்திரத்தில் நடித்திருக்கும் நானி படம் முழுவதும் ஆக்ரோஷமான நடிப்பை கொடுத்திருக்கிறார். அவருடைய தோற்றம் உடலமைப்பு சிகை அலங்காரம் என கதாபாத்திரத்துக்காக அவர் செய்திருக்கும் உழைப்பு நன்றாக தெரிகிறது. தாய் மகன் உறவு மற்றும் தனது மக்களுக்காக போராடும் காட்சிகளில் அவரது நடிப்பு கவனம் ஈர்க்கிறது
மோகன் பாபு வில்லன் கதாபாத்திரத்தில் கம்பீரமாக நடித்திருக்கிறார். குறிப்பாக அவரது தோற்றமும் அனுபவமான நடிப்பும் கதாபாத்திரத்திற்கு பலம் சேர்க்கிறது. சோனாலி குல்கர்னி நானியின் அம்மாவாக வலிமையான கதாபாத்திரத்தில் நடித்திருக்கிறார். கயாடு லோஹருக்கு இன்னும் அழுத்தமான காட்சிகள் கொடுத்திருக்கலாம் என்று தோன்றுகிறது. மற்ற நடிகர்களும் தங்களது கதாபாத்திரங்களுக்கு தேவையான நடிப்பை கொடுத்திருக்கிறார்கள்
படத்தின் மிகப்பெரிய பலம் ஒளிப்பதிவு மற்றும் கலை இயக்கம். பாரடைஸ் என்று சொல்லப்படும் பகுதியையும் அங்கு வாழும் மக்களின் வாழ்க்கை முறையையும் அழுக்கு மற்றும் சகதியான சூழலையும் பிரம்மாண்டமாகவும் வித்தியாசமாகவும் காட்சிப்படுத்தியிருக்கிறார்கள். 1980களின் செகந்திராபாத் பின்னணியும் நன்றாக உருவாக்கப்பட்டிருக்கிறது
அனிருத்தின் இசையும் பின்னணி இசையும் படத்தின் ஆக்ஷன் காட்சிகளுக்கு பலம் சேர்க்கிறது. ஆனால் சில இடங்களில் பின்னணி இசை அதிக சத்தமாக இருப்பது போல தெரிகிறது. பாடல்களில் சில ரசிக்க வைக்கின்றன
படத்தின் முக்கியமான குறை திரைக்கதையிலும் படத்தின் நீளத்திலும் இருக்கிறது. ஆரம்பத்தில் வித்தியாசமான உலகம் கதாபாத்திரங்களின் அறிமுகம் மற்றும் ஹீரோவுக்கும் வில்லனுக்கும் இடையிலான மோதல் என படம் நன்றாக தொடங்குகிறது. ஆனால் போக போக கதை முன்னேறுவதை விட தொடர்ந்து சண்டைக்காட்சிகளும் வன்முறையும் அதிகமாகிறது
ஒரு கட்டத்தில் நாயகன் அடிப்பதும் அடி வாங்குவதுமாகவே கதை நகர்வது சலிப்பை ஏற்படுத்துகிறது. சில காட்சிகளில் இருக்கும் அதிகப்படியான ரத்தம் மற்றும் கொடூரமான வன்முறை கதையின் உணர்வை விட அதிகமாக முன்னிலைப்படுத்தப்பட்டுள்ளது. இதனால் இரண்டாம் பாதியில் படம் சற்று நீளமாகவும் மெதுவாகவும் தோன்றுகிறது
ஒட்டுமொத்தமாக பார்க்கும்போது வித்தியாசமான கதைக்களம் பிரம்மாண்டமான காட்சியமைப்பு நானியின் நடிப்பு மற்றும் இசை ஆகியவை படத்தின் பலம். ஆனால் அதிகப்படியான வன்முறை ஒரே மாதிரியான ஆக்ஷன் காட்சிகள் மற்றும் நீளமான திரைக்கதை படத்தின் தாக்கத்தை குறைக்கிறது
தி பாரடைஸ் காட்சியளவில் பிரம்மாண்டமாக இருந்தாலும் கதையின் உணர்வை விட வன்முறை அதிகமாக நினைவில் நிற்கும் படமாக அமைந்திருக்கிறது.