‘காந்தி கண்ணாடி’ திரைப்பட விமர்சனம்

‘காந்தி கண்ணாடி’ திரைப்பட ரேட்டிங்: 3/5

Casting : KPY Bala, Namita Krishnamurthy, Balaji Sakthivel, Archana, Nikhila Sankar, Jeeva Subramanian, Aradhya Ritu Sara, Amudhavaanan, Manoj Prabhu, Madhan

Directed By : Sherief

Music By : Vivek–Mervin

Produced By : Adhimulam Creations – Jayi Kiran

காந்தி கண்ணாடி படத்தின் மையக் கதாபாத்திரமான காந்தி (பாலாஜி சக்திவேல்), தனியார் நிறுவனத்தில் செக்யூரிட்டி வேலை பார்த்து வரும் எளிய மனிதர். அவரின் மனைவி கண்ணம்மா (அர்ச்சனா) மீது அவர் காட்டும் அன்பே கதையின் உயிர். தம்பதிக்கு குழந்தை இல்லையென்றாலும், மனைவியை மகிழ்விக்க 60வது திருமண விழாவை மிகப்பெரிய திருவிழாவாக நடத்தவேண்டும் என்பதே காந்தியின் ஆசை. அதற்காக நிலத்தை விற்று பெரிய தொகையை கையில் பெற்றாலும், அதே நேரத்தில் மத்திய அரசு அறிவித்த பணமதிப்பிழப்பு அவரின் கனவுகளை முறியடிக்கிறது.

படத்தின் ஆரம்பத்தில் கதை எளிதில் புரிந்துவிடுகிறது. காந்தி–கண்ணம்மா இடையேயான பாசத்தை காட்டும் முயற்சி சில இடங்களில் உணர்ச்சிகரமாக இருந்தாலும், அதை அதிகப்படுத்தியிருப்பதால் நாடக ரீதியில் ஓவராகி விடுகிறது. பார்வையாளர்களுக்கு “அய்யோ பாவம் காந்தி” என்ற உணர்வை தருவதற்குப் பதிலாக, அது செயற்கையாகத் தோன்றுகிறது.

பணமதிப்பிழப்பு இன்னும் மக்களின் நினைவில் இருக்கும் உண்மை சம்பவம். ஆனால் படத்தில் அதை கையாளும் விதம் மிகப்பெரிய தாக்கத்தை ஏற்படுத்தவில்லை. காந்தியின் நிலத்தை விற்று பெரும் தொகை பெறுவது நம்பிக்கைக்குரியதாகத் தெரியவில்லை. மேலும், கதை எப்படிப் போகும் என்பதை முன்கூட்டியே கணிக்க முடிவதால், திரைக்கதை புதுமையற்றதாக மாறுகிறது.

பாலாஜி சக்திவேல், காந்தி கதாபாத்திரத்தில் உணர்ச்சிகளை நன்றாக வெளிப்படுத்தியிருந்தாலும், சில தருணங்களில் அது ஓவராகி சலிப்பை தருகிறது. கே.பி.ஒய். பாலா, எப்போதும் காமெடி பாத்திரங்களில் சிரிக்கவைத்தவர் என்பதால், இங்கு சீரியஸான வேடத்தில் வந்திருப்பது வித்தியாசமாக இருந்தாலும், சிலருக்கு ஏமாற்றமாக தோன்றலாம். அர்ச்சனா இயல்பாக நடித்திருந்தாலும், அவரிடம் இருந்த எதிர்பார்ப்பு அளவுக்கு மேல் இருந்ததால், ஓவர் டோஸ் உணர்வு கிடைக்கிறது.

காந்தி கண்ணாடி ஒரு நல்ல கருத்தை எடுத்துக்கொண்டாலும், அதை திரையில் சொல்லும் விதம் அதிகப்படியான உணர்ச்சியால் சீர்குலைந்துவிடுகிறது. கதைசொல்லும் பாணியில் எளிமை குறைவாகி, பார்வையாளர்கள் சோர்வடையும் நிலை உருவாகிறது. இருந்தாலும், பாலா–பாலாஜி சக்திவேல் இணைந்திருப்பது சில காட்சிகளில் படம் பார்ப்பதற்கான ஆர்வத்தை ஏற்படுத்துகிறது. உணர்ச்சியை கட்டுப்படுத்தியிருந்தால், படம் இன்னும் சிறப்பாக அமைந்திருக்கும்.