‘சொட்ட சொட்ட நனையுது’ திரைப்பட ரேட்டிங்: 3/5
Casting : Nishanth Ruso, Big Boss Varshini, Shalini, Robo Shankar, Pugazh
Directed By : Naveedh S Fareedh
Music By : Renjith Unni
Produced By : Adler Entertainment
வழுக்கைத் தலை பிரச்சனைகளை மையமாகக் கொண்டு உருவான படம்
இளம் வயதிலேயே வழுக்கை தலையால் பாதிக்கப்பட்ட நிஷாந்த் ரூசோ, திருமண வாழ்க்கையில் நுழைய முடியாமல் தவிக்கிறார். பொருளாதார வசதிகள் இருந்தும், பெண்கள் அவரை ஏற்காததால் மன வேதனை அடைகிறார். இப்படியான சூழ்நிலையில் எதிர்வீட்டில் வசிக்கும் வர்ஷிணி அவரை திருமணம் செய்ய முன்வருகிறாள். திருமண வேலைகள் ஜோராக நடக்கும் தருணத்தில் திடீரென நிஷாந்த் ரூசோ தான் திருமணத்தை நிறுத்துகிறார். அவர் ஏன் இப்படிச் செய்தார்? அவரது வாழ்க்கையில் திருமணம் கைகூடுமா? என்பதே மீதிக் கதை.
நிஷாந்த் ரூசோ தனது பாத்திரத்தில் உணர்வுகளை நன்றாக வெளிப்படுத்தியுள்ளார். வழுக்கைத் தலையால் இளைஞர்கள் சந்திக்கும் சிக்கல்களை நிஜமாகச் சித்தரித்திருக்கிறார். ஆனால், வழுக்கை விழுவது பெரிய குறைபாடாக காட்டியிருப்பது சிறிது அதிகமாகத் தோன்றுகிறது. நாயகிகளாக வர்ஷிணி, ஷாலினி இருவரும் தங்கள் கதாபாத்திரங்களைச் சிறப்பாக நிறைவேற்றியுள்ளனர்.
காமெடி பக்கம் பார்த்தால், ரோபோ சங்கர், புகழ், ராஜா, யோகி, வினோத் போன்ற காமெடி நடிகர்கள் பலர் இருந்தும், அதிகமாக சிரிக்க வைக்கும் காட்சிகள் குறைவாக உள்ளன. இது சிறிது பாழாக்கும் அம்சமாகவே தெரிகிறது.
ஒளிப்பதிவாளர் ரயீஷ், கதையின் மையமாக உள்ள வழுக்கைத் தலை பிரச்சனையை மையப்படுத்தி காட்சிகளை எடுத்துள்ளார். இசையில் ரெஞ்சித் உன்னி சராசரி நிலையைத் தந்துள்ளார். கதாபாத்திர வடிவமைப்பும், நடிப்பின் எதார்த்தமும் படத்திற்கு பலமாக உள்ளது. ஆனால் இரண்டாம் பாதியில் திரைக்கதை சீராக இல்லாததால் சில காட்சிகள் இணைப்பில்லாமல் காணப்படுகின்றன.
இயக்குநர் நவீத் எஸ். பரீத், வழுக்கைத் தலையால் வாழ்வோரின் வாழ்க்கையை சிரிப்பும் சிந்தனையும் கலந்த பாணியில் சொல்ல முயன்றுள்ளார். கதை சொட்டச் சொட்ட மனதில் பதிய வேண்டியது தான், ஆனால் சில இடங்களில் சுவாரஸ்யம் குறைவாக இருப்பதால் அது முழுமையாகப் பதியாமல் போய்விடுகிறது. மொத்தத்தில், நல்ல கரு கொண்ட படம் என்றாலும், முழுமையாக கவர்வதில் சற்றே பின்தங்குகிறது.