ஹாலிவுட் திரைப்படங்களைப் போல் தமிழில் ஒரு தரமான திரைப்படம் வந்திருக்கிறது அதுதான் ‘ஜோஷ்வா’
‘ஜோஷ்வா : இமை போல் காக்க’ திரைப்பட ரேட்டிங்: 3.5/5
Casting : Varun,Raahei, Krishna, Kitty, DD, Mansoor Alikhan, Visithira
Directed By : Gautham Vasudev Menon
Music By : Karthik
Produced By : Vels Film International – Ishari K. Ganesh
நாயகியை வில்லன்களிடமிருந்து நாயகன் ‘இமைபோல்’ காப்பதே படத்தின் ஒன்லைன். ஆனால், அவர் பார்வையாளர்களை காப்பாற்றினாரா என்பது படத்தின் சொல்லப்படாத மற்றொரு ஒன்லைன்.
வழக்கம்போல் கெளதம் மேனன் படங்களில் வருவதுபோல் நாயகனான ஜோஸ்வா மற்றும் நாயகி குந்தவை ஆகிய இருவரும் சந்தித்துக் கொள்கிறார்கள். காதலிக்கத் தொடங்குகிறார்கள். ஜோஸ்வா தான் பணத்திற்காக கொலை செய்யும் கூலிப்படையை சேர்ந்தவன் என்கிற உண்மையை குந்தவையிடம் சொல்கிறான். இருவரும் பிரிகிறார்கள்.
குந்தவை சர்வதேச அளவில் பிரபல வழக்கறிஞராக இருக்கிறார். போதைப் பொருள் கடத்தலில் ஈடுபட்டு கைதான மாஃபியா கும்பலின் தலைவனின் வழக்கை வாதாட இருக்கிறார் குந்தவை. இதனால் அவருடைய கூட்டாளிகள் அனைவரும் கொல்லப்படுகிறார்கள். குந்தவையை கொல்வதற்கு பெரும் தொகை பரிசாக அறிவிக்கப்படுகிறது. குந்தவையை இந்த கொலைகார கும்பல்களிடம் இருந்து காப்பாற்றி அந்த வழக்கை அவர் வாதாட வைப்பதே ஜோஸ்வாவின் இலக்கும் படத்தின் கதையும்.
முழுக்க முழுக்க ஆக்ஷன் திரைப்படமாக இப்படத்தை இயக்கியுள்ளார் இயக்குநர் கெளதம் மேனன். இந்த ஆக்ஷனை படமாக்கத் தேவையான வகையில் எந்த விதமான சுவாரஸ்யமும் இல்லாமல் ஒரு சாதாரணத்துக்கும் சுமாரான திரைக்கதையை வடிவமைத்திருக்கிறார்.
ஜேம்ஸ் பாண்ட் படத்தைப்போல் நாயகனுக்கு காஸ்டியூம் எல்லாம் கொடுத்து சண்டைக் காட்சிகளை சிறப்பாக அமைத்திருக்கிறார்கள். யானிக் பென் வடிவமைத்திருக்கும் சண்டைக் காட்சிகள் அதற்கேற்ற வகையில் ஸ்டெடி கேம் ஷாட்கள் இந்த காட்சிகளை இன்னும் மெருகேற்றுகின்றன. ஆனால் கதையும் திரைக்கதையும் இல்லாத இந்தப் படத்தை வெறும் ஸ்டண்ட் மாஸ்டர் மற்றும் ஒளிப்பதிவாளரால் காப்பாற்ற முடியாமல் போகிறது.
ஆக்ஷன் காட்சிகளைத் தவிர்த்து வருணின் நடிப்பு சகித்துக்கொள்ளமுடியாத அளவிற்கு சுமாராக இருக்கிறது. ரொமான்ஸ் மற்றும் செண்டிமெண்ட்டான காட்சிகளில் அவருக்கு க்ளோஸ்-அப் வைத்தது தவறான முடிவு. கெளதம் மேனனின் படத்தின் கதாநாயகனுக்கு ஒரு உடல்மொழி இருக்கும் இல்லையா? அதை செய்துகாட்டுகிறேன் என்கிற பெயரில் ஜி.டி.ஏ அனிமேஷன் வீடியோ கேமில் வருவது போல் உடலை அசைத்துக்கொண்டே இருக்கிறார் வருண். குந்தவையாக நடித்திருக்கும் ராஹே செயற்கையான பாவனைகளால் பார்வையாளர்களை எரிச்சல்படுத்துகிறார்.
படத்துக்கு எந்த வகையிலும் பயனளிக்காத பின் கதை, வீணடிக்கப்பட்டிருக்கும் கிருஷ்ணா கதாபாத்திரம், சம்பிரதாயத்துக்காக எழுதப்பட்ட திருப்பம், அழுத்தமில்லாத காதல் என அவசர அவசரமாக தயார் செய்யப்பட்ட கல்லூரி கால கடைசி நேர ப்ராஜெக்ட் போல் உள்ளது ‘ஜோஷ்வா’.
மொத்தத்தில் இந்த ‘ஜோஷ்வா.. தன் காதலியை இமைபோல் காக்கின்றான்’
