‘With Love’ திரைப்பட ரேட்டிங்: 3/5
CAST:
Abishan Jeevinth, Anaswara Rajan, Theni Murugan, Kalaimamani Saravanan, Harish Kumar, Kavya Anil, Sacchin Nachiappan, Sachana, RJ Ananthi, Dimple Kanna, Siddharth.
TECHNICAL CREW:
Writer–Director: Madhan | Producers: Soundarya Rajinikanth, Magesh Raj Pasilian | Music: Sean Roldan | DOP: Shreyaas Krishna | Edit: Suresh Kumar | Art: Raj Kamal | Lyrics: Mohan Rajan, Uma Devi, Madhan | Choreography: Santhosh | Action: PC Stunts (Karthik) | Costumes: Priya Ravi | Designs: Sarath J Samuel | PRO: Yuvraaj
With Love நம்மில் பலரின் வாழ்க்கையில் ஒருமுறை வந்துவிட்டு போன முதல் காதலின் நினைவுகளை மெதுவாகத் தொட்டு எழுப்பும் ஒரு இனிமையான காதல் படம். முதல் காதல் தோல்வியில் முடிந்திருந்தாலும், அதன் நினைவுகள் மனதின் எங்கோ ஒரு மூலையில் எப்போதும் உயிரோடே இருக்கும். அந்த நினைவுகளை மட்டும் சொல்லாமல், அவற்றை மீண்டும் தேடிச் செல்லும் பயணமாக இந்த படம் உருவாகியிருக்கிறது.
திருமண வயது கூடிக்கொண்டே போக, குடும்பத்தினர் பார்த்த பெண்ணை சந்திக்க சம்மதிக்கிறார் சத்யா. அந்த பிளைண்ட் டேட்டில் அவர் சந்திப்பது மோனிஷா. ஆரம்பத்தில் சாதாரண உரையாடலாக தொடங்கும் இந்த சந்திப்பு, இருவரின் கடந்த காலத்துக்குள் நம்மை அழைத்துச் செல்கிறது. பேச பேச, இருவருக்கும் முதல் காதல் என்ற ஒரு பொதுவான ஏக்கம் இருப்பதும், அதே பள்ளியில் சீனியர் ஜூனியராக படித்தவர்கள்தான் என்பதும் தெரிய வருகிறது. அப்போது தோன்றும் ஒரு யோசனையால், தங்கள் முதல் காதலை தேடிச் செல்லும் ஒரு பயணத்தை இருவரும் தொடங்குகிறார்கள். அந்த தேடல் அவர்களை கடந்த காலத்துக்கு அழைத்துச் செல்கிறதா அல்லது நிகழ்காலத்தில் புதிய காதலை உருவாக்குகிறதா என்பதே படத்தின் மையக்கரு.
பள்ளிப் பருவக் காதல் எந்த எதிர்பார்ப்பும் இல்லாத, தூய்மையான, ஆனால் அதே நேரத்தில் வலியும் நிறைந்த ஒன்று. அந்த நினைவுகளை இயக்குநர் மதன் மிக எளிமையாகவும் அழகாகவும் சொல்லியிருக்கிறார். படம் முழுவதும் ஒரு நாஸ்டால்ஜியா உணர்வு ஓடிக்கொண்டே இருக்கிறது. பழைய பள்ளி நாட்கள், நட்பு, முதல் ஈர்ப்பு, சொல்லப்படாமல் போன காதல் எல்லாமே நம்முடைய சொந்த நினைவுகளை போல தோன்றுகிறது.
அபிஷன் ஜீவிந்த் சத்யா என்ற கதாபாத்திரத்தில் மிகவும் இயல்பாக நடித்திருக்கிறார். பெரிய ஹீரோ இமேஜ் இல்லாவிட்டாலும், கதாபாத்திரத்தின் தயக்கம், ஏக்கம், குழப்பம், வலி ஆகிய உணர்வுகளை நேர்மையாக வெளிப்படுத்துகிறார். பள்ளி பருவமும் இளமை பருவமும் இரண்டிலும் பொருந்துகிறார். அனஸ்வரா ராஜன் மோனிஷாவாக படம் முழுக்க கண்களாலும் புன்னகையாலும் பேசுகிறார். துள்ளலான நவீன பெண்ணாகவும், அதே நேரத்தில் கடந்த காலத்தை ஆழமாக சுமக்கும் ஒருவராகவும் அவர் நடிப்பு அழகாக இருக்கிறது. சில இடங்களில் வசன உச்சரிப்பு சற்று உறுத்தினாலும், அவரது உடல் மொழியும் வெளிப்பாடும் அந்த குறையை மறக்க வைக்கிறது.
அனிஷாவாக வரும் காவ்யா அனில் குறைந்த காட்சிகளிலேயே மனதில் பதியும் வகையில் நடித்திருக்கிறார். பாலாஜியாக வரும் சச்சின் நாச்சியப்பன், நண்பர்களாக வரும் ஹரிஷ் குமார் உள்ளிட்ட துணை நடிகர்கள் அனைவரும் கதைக்கு தேவையான எடை சேர்த்திருக்கிறார்கள். அக்காவாக வரும் ஆர்ஜே ஆனந்தி இயல்பான நடிப்புடன் கவனம் ஈர்க்கிறார்.
படத்தின் முதல் பாதி மிகவும் லேசாகவும் சுவாரஸ்யமாகவும் நகர்கிறது. நகைச்சுவை, காதல், பழைய நினைவுகள் எல்லாம் ஒன்றாக கலந்து ரசிக்க வைக்கிறது. இரண்டாம் பாதியில் உணர்ச்சிகள் கொஞ்சம் கனமாக மாறுகின்றன. ஏற்றுக்கொள்வது, விட்டுக் கொடுப்பது, நிகழ்காலத்தின் முக்கியத்துவம் போன்ற விஷயங்களை படம் மெதுவாக பேசுகிறது. சில இடங்களில் நீளமாக உணர்ச்சியை இழுக்கும் போக்கு இருந்தாலும், மொத்த அனுபவம் நிறைவாக இருக்கிறது.
ஷான் ரோல்டனின் இசை படத்திற்கு பெரிய பலம். பாடல்கள் இளமைத் துள்ளலையும், பின்னணி இசை காதலின் வலியும் இனிமையும் உணர்த்துகிறது. குறிப்பாக பழைய பாடல்களை பயன்படுத்திய விதம் நன்றாக பொருந்துகிறது. ஸ்ரேயாஸ் கிருஷ்ணாவின் ஒளிப்பதிவு பள்ளி நாட்களின் நினைவுகளையும், பயணக் காட்சிகளின் அழகையும் மென்மையாக காட்டுகிறது. படத்தொகுப்பும் கதையின் ஓட்டத்தை பெரிதாக பாதிக்காமல் சீராக நகர்கிறது.
With Love எந்த பெரிய ட்விஸ்ட்களும் இல்லாத, எளிய காதல் கதை தான். சில இடங்களில் சினிமா வசதிக்காக அமைக்கப்பட்ட சம்பவங்களும், சிறிய குறைகளும் இருக்கின்றன. ஆனாலும், இந்த படம் சத்தம் இல்லாமல் மனதை நனைக்கும் ஒரு அனுபவத்தை தருகிறது. கடந்த காலக் காதல் ஒரு அழகான நினைவு, ஆனால் வாழ்க்கை என்பது நிகழ்காலம் என்பதை மென்மையாக சொல்லுகிறது. இரட்டை அர்த்தம் இல்லாமல், அதிரடி இல்லாமல், இயல்பான உணர்வுகளால் நகரும் இந்த படம், ஒரு நல்ல ஃபீல் குட் காதல் அனுபவமாக மனதில் இடம் பிடிக்கிறது.
மொத்தத்தில் இந்த, ‘With Love’ VALENTINE காலத்திற்கு பொருத்தமான, எளிய, இனிமையான காதல் படம் என்று சொல்லலாம்.
