‘ஹார்டிலே பேட்டரி’ வெப் சீரிஸ் ரேட்டிங்: 3.5/5
#ஹார்டிலிபேட்டரி – #HeartilyBattery
Produced by -Elsyium Maxima & Allo Media
Genre -Quirky Romance
Cast -Guru Lakshmanan, Padine Kumar, Sumithra Devi, Anith Yash Paul etc
Streaming Platform -Zee 5
‘ஹார்டிலே பேட்டரி’ ஒரு லைட்-ஆகவும், புத்துணர்ச்சியுடனும் நகரும் ரொமான்டிக் சயின்ஸ் பிக்ஷன் வெப் சீரிஸ். வழக்கமான காதல் கதைகளிலிருந்து சற்று வித்தியாசமாக, “காதலை உண்மையிலேயே அளவிட முடியுமா?” என்ற ஒரு சுவாரஸ்யமான கேள்வியை மையமாக வைத்து இந்த தொடர் பயணம் செய்கிறது.
சோஃபியா (பாதினி குமார்) சிறு வயதிலிருந்தே அறிவியலுக்கு ஆர்வம் கொண்டவள். தன்னைச் சுற்றியுள்ள தோல்வியடைந்த உறவுகளைப் பார்த்து, காதல் என்பது உணர்ச்சி இல்லை; அது உயிரியல், வேதியியல் கலவை மட்டுமே என்ற முடிவுக்கு வருகிறாள். அதனால் காதலில் இருக்கும் குழப்பத்தை நீக்க, “லவ் மீட்டர்” என்ற ஒரு கருவியை உருவாக்குகிறாள். இன்று நாம் உடல்நலத்தை பரிசோதிக்க மெஷின்களைப் பயன்படுத்துவது போல, காதலின் உண்மையையும் அளவிட முடியும் என்ற அவளின் எண்ணமே கதையின் மையம்.
அந்த வாழ்க்கையில் திடீரென நுழைவதுதான் சித் (குரு லக்ஷ்மன்). காமிக் ரைட்டரான அவன், அறிவியலைவிட உணர்வுகளையும் உள்ளுணர்வையும் நம்புபவன். காதல் மதிப்பெண் போடக்கூடிய விஷயம் இல்லை என்பதில் உறுதியாக இருக்கிறான். இந்த இரண்டு முற்றிலும் எதிர்மறையான சிந்தனைகள் மோதும்போது தான் கதையின் சுவாரஸ்யம் ஆரம்பிக்கிறது.
பாதினி குமாரின் சோஃபியா கதாபாத்திரமே இந்த சீரிஸின் மிகப் பெரிய பலம். வெளியில் தன்னம்பிக்கை, புத்திசாலித்தனம்; உள்ளுக்குள் உணர்வுகளை கையாள தெரியாத பயம்—இந்த இரட்டை முகத்தை அவர் அழகாக வெளிப்படுத்தியுள்ளார். குரு லக்ஷ்மனும் சித்தாக நகைச்சுவை, நெகிழ்ச்சி, இயல்பான நடிப்பு என்று கதாபாத்திரத்திற்கு உயிர் கொடுத்திருக்கிறார்.
இந்த தொடர் பெரிய டிராமாவோ, கனமான சோகமோ இல்லாமல், சுலபமாக நகரும் ஒரு ரொம்காம். அதே நேரத்தில், இன்றைய காலத்தில் மெஷின்கள் நம் வாழ்க்கையை எவ்வளவு ஆளுகின்றன, எல்லாவற்றையும் அளவிட முயற்சிப்பது சரியா என்ற கேள்வியையும் மெதுவாக கேட்கிறது. சோஃபியா தன் சொந்த காதலை அந்த மெஷினால் சோதிக்க முடிவு செய்வதிலிருந்து பல சுவாரஸ்யமான சம்பவங்கள் நடக்கின்றன.
மொத்தத்தில், ‘ஹார்டிலே பேட்டரி’ ஒரு க்யூட், வித்தியாசமான ஐடியாவுடன் வந்த காதல் தொடர்.
